Ёр не, рӯй ба гулшан чӣ кунам?
Ҷилваи сурию савсан чӣ кунам?
Манзари дидаи равшан рухи ӯст,
Бе рухаш дидаи равшан чӣ кунам?
Шаб чу дарн-оядам он моҳ зи дар,
Партави моҳ зи равзан чӣ кунам?!
Чоки дил дӯхта не, з-ашку мижа
Ин ҳама риштаву сӯзан чӣ кунам?!
Гуфтам: – Омад ба лабам ҷон зи ғамат.
Гуфт: – Ошиқ ту шудӣ, ман чӣ кунам?!
Гуфтам: – Аз ҳаҷр ба теғам бираҳон.
Гуфт: – Хуни ту ба гардан чӣ кунам?!
Фанни ман ошиқӣ омад, Ҷомӣ,
Сарфи авқот ба ҳар фан чӣ кунам?!