72
Ай дар ғами ту ба сӯзу ёраб
Бигрӣста осмон ҳама шаб!
Гар чарх бигиряду бихандад,
Он ҷазбаи хок бошад ағлаб!
Азбаски бирехт ашк бар хок,
Шуд хок зи ашки ӯ мутайяб1!
Аз гиряи осмон даромад
Сад боғ ба хандаи музаҳҳаб2!
Ман будаму чарх дӯш гирён,
Ӯрову маро якест мазҳаб!
Аз гиряи осмон чӣ рӯяд?!
Гулҳову бунафшаи мураттаб!
В — аз гиряи ошиқон чӣ рӯяд?!
Сад миҳр даруни он шакарлаб!
Он чашм ба гиря мефишорад,
То бифшорад нигор ғабғаб!
Ин гиряи абру хандаи хок
Аз баҳри ману ту шуд мураккаб!
В-ин гиряи мову хандаи мо
Аз баҳри натиҷа шуд мураттаб!
Хомӯш куну назора мекун
Андар талаби ҷаҳону матлаб!
1 Атрбез, хушбӯ.
2 Пуртароват, тару тоза.