378
Гар ба хилват дидаме ӯро ба ҷое сер-сер,
Бе рақибаш додаме ман бӯсаҳое сер-сер!
Бас хатоҳо кардаам дуздида, лекин орзуст
Бо лаби турки Хато рӯзе хатое сер-сер!
То яке ишрат бибинад чарх, к-ӯ ҳаргиз надид,
Ишрати кадбонуе бо кадхудое сер-сер!
Як ба як бегонагонро аз миён берун кунед,
То канорам гирад он дам ошное сер-сер!
Дасти ӯ гирам, ба майдон андар оям пойкӯб,
Мезанам з-он даст бо ӯ дасту пое сер-сер!
Ай хушо рӯзе, ки бикшояд қаборо банд-банд,
То кашам ӯро бараҳна, бе қабое сер-сер!
Дар фироқи Шамси Табрезӣ аз он коҳид тан,
То фазояд ҷонҳоро ҷонфизое сер-сер!