Кай бувад ҷонам зи банди ғам раҳоӣ ёфта,
Дида аз дидори ҷонон рӯшноӣ ёфта?
Кай бувад ҷони фигору синаи маҷрӯҳи ман,
Марҳами васле бар ин доғи ҷудоӣ ёфта?
Кай бувад з-он хатти ҷонафзою лаъли дилкушой
Бахти ман фирӯзиву комам равоӣ ёфта?
Кай бувад дасти ману он турраи анбарфишон,
К-аз насимаш ҷаъди сунбул атрсоӣ ёфта?
Рафт аз ин бустон навои айшу барги хуррамӣ,
Хуррам он мурғе, ки барг аз бенавоӣ ёфта!
Булбули бесабру дил бо хор аз он дарсохтаст,
К-аз гули ин боғ бӯйи бевафоӣ ёфта.
Бо сарири шоҳиву тоҷи каёнӣ Ҷам наёфт,
Ҷомӣ, он ганҷе, ки дар кунҷи гадоӣ ёфта.