124
Ғайри ишқат роҳбин ҷустем, нест,
Ҷуз нишонат ҳамнишин ҷустем, нест!
Ончунон ҷустан, ки мехоҳӣ, бигӯ,
К-ончунонро инчунин ҷустем, нест!
Баъд аз ин бар осмон ҷӯем ёр,
З-он ки ёре дар замин ҷустем, нест!
Чун хаёли мо туйӣ, ай бехаёл,
То ба чархи ҳафтумин ҷустем, нест!
Биҳтар он бошад, ки маҳви ин шавем,
К-аз ду олам биҳ аз ин ҷустем, нест!
Софҳои ҷумла олам хурда гир,
Ҳамчу дурди дарди дин ҷустем, нест!
Ҳотами мулки Сулаймон ҷустанист,
Ҳалқаҳо ҳасту нигин ҷустем, нест!
Сурате, к-андар нигини ӯ будаст,
Дар бутони Руму Чин ҷустем, нест!
Ончунон сурат, ки шарҳаш мекунам,
Ҷуз ки суратофарин ҷустем, нест!
Андар он сурат яқин ҳосил шавад,
К-аз варои он яқин ҷустем, нест!
Ҷойи он ҳаст, ар гумони бад барем,
З-он ки бе макре амин ҷустем, нест!
Пушти мо аз занни бад шуд чун камон,
З-он ки роҳе бе камин ҷустем, нест!
З-ин баён нуре, ки пайдо мешавад,
Дар баёну дар мубин ҷустем, нест!