Hafez

Бибурд аз ман қарору тоқату ҳуш

Ғазали 282

Бибурд аз ман қарору тоқату ҳуш,
Бути сангиндили симинбуногӯш.

Нигоре, чобуке, шанге кулаҳдор,
Зарифе, маҳваше, турке қабопӯш.

Зи тоби оташи савдои ишқаш
Ба сони дег доим мезанам ҷӯш.

Чу пероҳан шавам осудахотир,
Гараш ҳамчун қабо гирам дар оғӯш.

Агар пӯсида гардад устухонам,
Нагардад меҳраш аз ҷонам фаромӯш.

Дилу динам, дилу динам бибурдаст
Бару дӯшаш, бару дӯшаш, бару дӯш.

Давои ту, давои туст, Ҳофиз,
Лаби нӯшаш, лаби нӯшаш, лаби нӯш.

Андешаатонро баён кунед

Пайгирӣ кунед