Чун камар баста маҳи ман ба сафар берун рафт

251

Чун камар баста маҳи ман ба сафар берун рафт,
Сад дил овехта аз тарфи камар берун рафт.

Ӯ қадам мезаду мардум ҳама дар хун буданд,
Ки бад-он шакли хуш аз пеши назар берун рафт.

Нест ин хуни равонам зи сари ҳар мижа ашк,
Ҷӯш зад дар дили ман хуну зи сар берун рафт.

Манъи носеҳ зи ғами ишқи ваям боде буд,
Ки зи як гӯш даромад, зи дигар берун рафт.

Қатраи об ки омад ба дил аз пайконаш,
Ҳирқат1 аз ҷону ҳарорат зи ҷигар берун рафт.

Нест дар ҳалқаи ушшоқ забон, ҳайронам,
К-аз забоне, ки аз он ҳалқа хабар берун рафт.

Дӯш дар кулбаи Ҷомӣ зи нами дидаву оҳ
Оташ аз равзанаву об зи дар берун рафт.

Абдурраҳмони Ҷомӣ


1 Ҳирқат – сӯхтан.

Добавить комментарий

Ваш адрес email не будет опубликован. Обязательные поля помечены *