Андар ин ҷамъ шарарҳо зи куҷост?!

Андар ин ҷамъ шарарҳо зи куҷост?!
Дуди савдои ҳунарҳо зи куҷост?!

Ман сари риштаи худ гум кардам,
К-ин мухолифшуда сарҳо зи куҷост?!

Гар на дилҳои шумо мухталифанд,
Дар ман аз ҷанг асарҳо зи куҷост?!

Гар чу занҷир ба ҳам пайвастем,
Ин фурӯбастани дарҳо зи куҷост?!

Гар на сад мурғи мухолиф ин ҷост,
Ҷангу баркандани парҳо зи куҷост?!

Соқиё, бода ба пеш ор, ки май
Худ бигӯяд, ки дигарҳо зи куҷост!

Ту агар ҷуръа нарезӣ бар хок,
Хокро аз ту хабарҳо зи куҷост?!

Мавлоно Ҷалолуддини Балхӣ. 800 ғазали дилошӯб. — Душанбе: «Адиб», 2007, 856 саҳ.