Он шуълаи нур мехиромад

Он шуълаи нур мехиромад
В-он фитнаи ҳур мехиромад!

Шаб ҷома сапед кард, зеро
К-он моҳ зи дур мехиромад!

Мастони шабонаро башорат:
Соқӣ ба саҳур⁵⁹ мехиромад!

Ҷонро ба мисоли уд сӯзем,
К-ин кони булӯр мехиромад!

Он фитна нигар, ки бори дигар
Бо сад шару шӯр мехиромад!

Он душмани сабрҳои ошиқ
Дар хуни сабур мехиромад!

Ҷонам ба фидои он Сулаймон,
К-ӯ ҷониби мӯр мехиромад!

Ҷуз чиҳраи ошиқон мабинед,
К-он шоҳи ғаюр мехиромад!

Дар қолаби халқ Шамси Табрез
Чун нафхаи сур мехиромад!


⁵⁹ Пештар аз бомдод, барвақт.

Мавлоно Ҷалолуддини Балхӣ. 800 ғазали дилошӯб. — Душанбе: «Адиб», 2007, 856 саҳ.