Имрӯз нигори мо наёмад

Имрӯз нигори мо наёмад,
Он дилбару ёри мо наёмад!

Он гул, ки миёни боғи ҷон аст,
Имшаб ба канори мо наёмад!

Саҳро гирем ҳамчу оҳу,
Чун мушки татори мо наёмад!

Ай равнақи мутрибон, ҳамин гӯ,
К-ин равнақи кори мо наёмад!

Ором мадиҳ ту ною дафро,
К-орому қарори мо наёмад!

Он соқии ҷон нагашт пайдо,
Дармони хумори мо наёмад!

Шамси Табрез, шарҳ фармо,
Чун фасли баҳори мо наёмад?!

Мавлоно Ҷалолуддини Балхӣ. 800 ғазали дилошӯб. — Душанбе: «Адиб», 2007, 856 саҳ.