Ҳар ки дар ӯ нест аз ин ишқ ранг

Ҳар ки дар ӯ нест аз ин ишқ ранг,
Назди Худо нест ба ҷуз чӯбу санг!

Ишқ баровард зи ҳар санг об,
Ишқ тарошид зи ойина занг!

Куфр ба ҷон омаду имон ба сулҳ,
Ишқ бизад оташ дар сулҳу ҷанг!

Ишқ кушояд даҳан аз баҳри дил,
Ҳар ду ҷаҳонро бихурад чун наҳанг!

Ишқ чу шер аст, на макру на рев,
Нест гаҳе рӯбаҳу гоҳе паланг!

Чунки мадад бар мадад ояд зи ишқ,
Ҷон бираҳад аз тани торику танг!

Ишқ зи оғоз ҳама ҳайрат аст,
Ақл дар ӯ хираву ҷон гашта данг!

Дар Табрез аст дилам, ай сабо,
Хидмати моро бирасон бедаранг!

Мавлоно Ҷалолуддини Балхӣ. 800 ғазали дилошӯб. — Душанбе: «Адиб», 2007, 856 саҳ.