Гар теғ борад дар кӯйи он моҳ,
Гардан ниҳодем, алҳукму лиллоҳ.

Оини тақво мо низ донем,
Лекин чӣ чора бо бахти гумроҳ?

Мо шайху воиз камтар шиносем,
Ё ҷоми бода, ё қисса кӯтоҳ!

Ман ринду ошиқ, дар мавсими гул,
Он гоҳ тавба? Астағфируллоҳ!

Меҳри ту аксе бар мо наяфганд,
Оинарӯё, оҳ аз дилат, оҳ!

Ас-сабру муррун ва-л-умру фонин,
Ё лайта шеърӣ ҳаттома алқоҳ.

Ҳофиз, чӣ нолӣ, гар васл хоҳӣ?
Хун боядат хӯрд дар гоҳу бегоҳ.