326
Касе, ки ошиқи он равнақи чаман бошад,
Аҷаб мадор, ки дар бедилӣ чу ман бошад!
Ҳадиси сабр магӯед, сабрро раҳ нест
Дар он диле, ки бад-он ёр мумтаҳан бошад!
Чу ишқ силсилаи хешро биҷунбонад,
Ҷунуни ақли Фалотуну Булҳасан бошад!
Ба ҷони ишқ, ки ҷоне зи ишқ ҷон набарад
В-агар дарунаи сад бурҷу сад бадан бошад!
Агар чу шер шавӣ, ишқ шергири қавист
В-агар чу пил шавӣ, ишқ каркадан бошад!
В-агар ба қаъри чаҳе дарравӣ барои гурез,
Чу далв гардан аз ӯ бастаи расан бошад.
В-агарчи мӯй шавӣ, мӯй мешикофад ишқ
В-агар кабоб шавӣ, ишқ бобзан бошад!
Амони олами ишқ асту маъдалат ҳам аз ӯст
В-агарчи роҳзани ақли марду зан бошад!
Хамӯш кун, ки суханро ватан Димишқи дил аст,
Магӯ ғариб варо, к-аш чунин ватан бошад!