314
Имсол булбулон чӣ хабарҳо ҳамедиҳанд?!
Ё Раб, ба тӯтиён чи шакарҳо ҳамедиҳанд?!
Дар боғҳо дарой ту имсолу дарнигар,
К-он шохҳои хушк чи барҳо ҳамедиҳанд!
Миқроз1 дар миён наву хилъат ҳамебуранд,
В-онро, ки тоҷ рафт, камарҳо ҳамедиҳанд!
Бе миннати касе ҳама бар нуқра мезананд,
Бе заҳмати мусодира зарҳо ҳамедиҳанд!
Ҳар дил, ки ташна аст, ба дарё ҳамебаранд,
В-онро, ки гавҳар аст, гуҳарҳо ҳамедиҳанд!
Ин туҳфа дидаанд, ки ушшоқи рӯзгор
То бар шумори мӯйи ту сарҳо ҳамедиҳанд?!
Ин нур дидаанд, ки девонагони роҳ
Савдо ҳамехаранду ҳунарҳо ҳамедиҳанд?!
1 Қайчӣ, гоз.